உடம்பொடு புணர்த்தல்

எல்லாருக்கும் வணக்கங்க!

இலக்கணமின்னாலே எட்டுகாத தூரம் தெறிச்சு ஓடுற உங்கள மாதிரி ஒருத்தன்தாங்க நானும்...! இலக்கணம் படிச்சா நாம மொழியைப் பேசுறோம்? எழுதுறோம்? அதெல்லாம் நமக்கெதுக்குன்னு  பள்ளிக்கூடத்தில படிக்கும் போது சிரமப்பட்டு உயிர்மெய், ஆய்தம், குற்றியலுகரம், லிகரமின்னு 2 மதிப்பெண் வாங்கிறதுக்காக இதையெல்லாம் மனப்பாடம் பண்ணதோட சரி!

சரிங்கைய்யா, இதனோட பயன்பாடு என்னங்கய்யான்னு அப்பக் கேக்க தைரியம் இல்லாம போச்சு! சரி! தமிழில எழுதுறோமே இப்பயாவது புரிஞ்சுக்கப் பாப்போமேன்னு நினைச்சுத் தொல்காப்பியத்த வாங்கித் தொறந்தா ஒரு இழவும் புரிய மாட்டேங்குது...! பாயிரமின்னு முதல்ல தொடங்குது...“வடவேங்கடம் தென்குமரி ஆயிடை தமிழ்கூறும் நல்லுலகு“ ன்னு..! அதுக்குப்போய் பத்துபக்கத்துக்கு விளக்கம் சொல்றாங்க..! ஐயோ ன்னு அலறினா அரசன் சண்முகனார்ன்னு ஒருத்தரு நூறு பக்கத்துக்கு விளக்கியிருக்காருன்னு சொல்றாங்க ! சரி நேரா தொல்காப்பியப் பாட்டுக்குள்ளயே போயிடுவோமின்னு போனா, என்ன அருமையா இப்பக் கூட புரிஞ்சிக்கிற மாதிரி இரண்டாயிரம் வருடத்துக்கு முன்னாடி எழுதி வைச்சிருக்கான்.

“  எழுத்தெனப் படுப

  அகர முத

  னகர இறுவாய் முப்பஃது என்ப

  சார்ந்துவரல் மரபின் மூன்று அலங்கடையே “

சாதாரணமா தமிழ் பத்தித் தெரிஞ்சிருந்தாப் போதுங்க. நாமளே இதுக்கு அர்த்தம் சொல்லிடலாம்.

“ தமிழ்ல எழுத்துன்னா “அ“ வில ஆரம்பிச்சு “ன்“ முடிய முப்பதுன்னு சொல்லுவாங்க. இந்த முப்பதோட இதுமாதிரி தனியா வாராம இதைச் சார்ந்து வரக்கூடிய இன்னொரு மூணும் இருக்கு“
இதுதாங்க தொல்காப்பியர் சொல்லவர்றது. ஆனா இதுக்கு உரைன்னு பதிமூணு பக்கம் விளக்கம் சொல்றாங்க! இது பரவாயில்ல, சிவஞான முனிவர்னு ஒருத்தர் இந்த முதல் பாட்டுக்கு விளக்கமா எழுதினது தொல்காப்பிய முதல் சூத்திர விருத்தின்னு தனிப்புத்தகமாவே வந்திருக்கின்னாங்க. எல்லாம் தமிழ்ல தான இருக்கு ...? இவன் என்னமோ வடநாட்டுக்காரன் மாதிரிப் புரியலே புரியலேங்கிறான்னு சொல்றவங்க இளம்பூரணர், நச்சினார்க்கினியர் உரைகளை ஒரு தடவைப் பாருங்க!

      சரி இப்ப என்னதான் சொல்ல வரேன்னு நீங்க சொல்றது
கேக்குது ! இதை நான் படிக்கும்போது இரண்டு வழி எனக்கு இருந்தது.

ஒண்ணு மண்டைய உடைச்சு என்னதாண்டா இந்த உரைக்குள்ள இருக்குன்னு பாக்குறது..., இல்லைன்னா வேற வேலைய பாக்கப் போறது..! நான் மண்டைய உடைச்சிக்கிட்டேன். வேண்டாமின்னு வேறவேலையப் பாத்துக்கிட்டு இருக்கிற, மண்டைய உடைச்சுக்க விரும்பாதவங்களுக்காக எனக்குப் புரிஞ்சத எழுத நினைக்கிறேன். அவ்வளவு தான்!

சரி. இப்பயாவது தலைப்புக்கு வருவோம்.

பள்ளிக்கூடத்தில நாம படிக்கும் போது இலக்கணக்கேள்விய, எடுத்துக்காட்டோட விளக்க, (விளங்கிக்க) எவ்வளவு சிரமப்பட்டிருக்கோம்?

எனக்கு நல்லா ஞாபகம் இருக்கு...! குற்றியலிகரத்துக்கு நான் படிச்ச எடுத்துக்காட்டு...கேண்மியா...இதை மறந்துத் தொலைக்காம இருக்க நான் பூனையை ஞாபகம் வைச்சுகிட்டது ( “மியா“ ங்குமே) இன்னைக்கும் குற்றியலிகரம்னு யாராவது சொன்னா எனக்கு முதல்ல நினைப்பு வர்றது இந்தப் பூனைதான். ஏன்னா இலக்கணத்துக்கான வரையறைகளை மனப்பாடம் செஞ்சிருப்போம். புழக்கத்தில இல்லாத எடுத்துக்காட்டுகள் சட்டுன்னு மறந்து போயிடும்.

ஒரு வேளை வரையறையையே  எடுத்துக்காட்டாவும் இருந்தா எவ்வளவு நல்லாயிருக்கும்? அப்படின்னு அப்பத் தோணிச்சு. இப்பத் தொல்காப்பியம், நன்னூல் ன்னு படிக்கும் போதுதாங்க தெரியுது, நாம நினைச்சதை அதே மாதிரி சூத்திரமாச் சொன்ன தொல்காப்பியர் மாதிரியான ஆசிரியர்களும் இருக்காங்கன்னு!

உதாரணமா பாருங்களேன், எழுத்துக்கு அளவு சொல்ல வந்த தொல்காப்பியர், குறில் (அதாங்க – அ, இ, உ, எ, ஒ ) 1 மாத்திரை.

நெடில் ( ஆ ஈ ஊ ஏ ஐ ஓ ஔ )  2 மாத்திரை ன்னு சொல்லுவாரு.

அப்புறம் மூணு மாத்திரை உள்ள ஓர் எழுத்துத் தமிழில் இல்லைம்பாரு. வடமொழில மூணு மாத்திரை உள்ள எழுத்துக்கள் இருக்கு. ஒவ்வொரு இடத்திலயும் தமிழ் வேற, வடமொழி வேறங்கிற கவனத்தோட தான் தொல்காப்பியர் இப்படி வித்தியாசம் வர்ற இடத்த எல்லாம் சொல்லிகிட்டு வருவார். சரி மூணுமாத்திரை வர்ற மாதிரி ஓசை அதிகரிச்சு வர்றப்ப அத எப்படி எழுதிக் காட்டறது? தொல்காப்பியர் சொல்வார், அப்படி மூணு மாத்திரை வர்ற எழுத்து நம்ம கிட்ட இல்ல! 2 மாத்திரையை விட கூட அளவு வர்ற மாதிரி எழுதனுமா ? அதே ஓசை இருக்கமாதிரி உள்ள ஒரு மாத்திரை உள்ள எழுத்தை அந்த இரண்டு மாத்திரை உள்ள எழுத்துக்குப் பக்கத்தில சேர்த்து எழுதிக்காட்டுப்பா! படிக்கிறவன் அந்த இடத்தப் பாத்து ஓசையைக் கொஞ்சம் கூட்டிச் சொல்லிக்கட்டுமின்னு சொல்றார்.

இப்ப அந்தச் சூத்திரத்தப் பாப்போம்.

“ நீட்டம் வேண்டின் அவ்வளபு உடைய

  கூட்டி எழூஉதல் என்மனார் புலவர் ” 

எப்படிங்க எழுதுறது? உதாரணத்தைக் கோனார் உரை பாத்துத் தெரிஞ்சுக்கனுமான்னு கேட்டா இல்லப்பா பாட்டையே நல்லாப் பாரு!

அதிலேயே காட்டி இருக்கேனேங்கிறார். சூத்திரத்தில இருக்கிற
எழூஉதல்(எ (ழ்+ஊ)+உ தல்) என்ற சொல்லைப் பாருங்க!
 ஊ என்கிற ஓசையை நீட்ட வேண்டியிருக்கு. அதுக்குப் பக்கத்தில அதோட ’உ’ என்கிற குறிலைப் போட்டாப் படிக்கிறவன் அந்த இடத்தப் படிக்கும் போது ஓசையைக் கொஞ்சம் நீட்டிப்படிச்சுக்குவான். விதி சொல்றது மாதிரியே விதிக்குள்ளயே உதாரணத்தையும் சேத்து சொல்லியாச்சு. இப்படிச் சொல்ற உத்திக்குப் [Technique] பேருதாங்க உடம்பொடு புணர்த்தல். இது போல நிறைய இடங்கள இலக்கண நூற்பாக்களில நீங்க பார்க்கலாம்.

நன்னூல்ல இருந்து ஒரே ஒரு எடுத்துக்காட்டு.

குற்றியலுகரத்தில முடியிற சொல்லுக்கு (எ.கா. காற்று) அடுத்த சொல் உயிர் எழுத்துல தொடங்கினா,  ( காற்று + ஆடி)  குற்றியலுகரமா வர்ற ”உ” தன்கூட இருக்க மெய்யெழுத்தை அம்போன்னு விட்டுப் ஓடிப் போயிடுமாம்.  ( காற் ற்+ உ + ஆ டி) . இப்ப விதிப்படி  உ போய்,

காற் (ற்+ஆ) டி = காற்றாடி

என்று ஆகும்.

இப்பக் கொஞ்சம், நன்னூல் விதியப் பாப்போம்.

 “ உயிர்வரின் உக்குறள் மெய்விட் டோடும் “

 விட்டு + ஓடும்  = விட்டோடும்

( விட் (ட் + உ)  + ஓடும் = விட்ட் + ஓடும் = விட்டோடும்.

என்கிறதில் எது விட்டு ஓடினதின்னு பாத்திங்களா? விதியச் சொல்றது மாதிரியே எப்படி விதிக்கான எடுத்துக்காட்டையும் சொல்லி இருக்காங்க. வடிவேலு சொல்ற மாதிரி எதையும் பிளான் பண்ணி பண்ணியிருக்காங்க போலத் தோணுது! இது மாதிரிப் பல செய்திகளை நாம் உரையைப் படிச்சாதாங்க தெரிஞ்சிக்க முடியும்! அட! இப்படி யெல்லாமாடா யோசிப்பானுங்கன்னு பிரமிக்க வைச்சிடுவாங்க நம்ம உரைக்காரங்க !

சரி! இப்பப் பழைய பூனைக் கதைக்கு வர்றேன்.

கேண்மியா ன்னா நாம இன்னைக்கு சொல்ற “ கேளுங்கய்யா “ என்கிற அர்த்தந்தான்!

கேண்ம் + யா தான் அதோட வடிவம் ( கேள்+ அய்யா ங்கிற மாதிரி )

இதக் கேண்ம் யா ன்னு சேர்த்து வேகமாச் சொல்லிப் பாருங்களேன். நடுவுல ஒரு இ நுழைஞ்சமாதிரி இருக்கும். ( ஈ இல்லங்க ) அந்த இகரம் தாஞ்சாமி ஒரு மாத்திரையா இல்லாம அளவு குறைஞ்ச குற்றியல் இகரம்.

இவ்வளவு நேரம் பொறுமையா படிச்ச உங்களுக்கு ஒரு கேள்வி! இந்த உடம்பொடு புணர்த்தல் இலக்கியத்திலயும் வந்திருக்கு! திருக்குறள்ல நான்கு குறள்கள்ல இருக்கு. திருமுருகாற்றுப் படையில ஓரிடத்தில் வருது. தேட ஆசைப்படுறவங்க பரிமேலழகரையும் நச்சினார்க்கினியாரையும் பாருங்க!

சரியாக் கண்டுபிடிச்சுச் சொன்னிங்கன்னா அடுத்து இதே போல இன்னொரு  செய்தி உங்களுக்காக காத்துகிட்டு இருக்கும்.

( என்னுடைய இன்னொரு பதிவு உரைச்சுத்தியில் உடைபடும் சொற்கள் என்று எழுதினேன். எந்த வடிவம் வசதிப்படும் என்றால் அப்படி எழுத ஆவலாய் இருக்கிறேன். படிப்பவர்கள் கருத்திட்டால் படித்தவற்றுள் சிலவற்றை உங்களோடு பகிர்ந்திட முயல்வேன். முத்து நிலவன் அய்யா, பாரதிதாசன் அய்யா போன்ற தமிழறிஞர்கள் கருத்திட வேண்டுகிறேன். சொற்பிழையோ கருத்துப் பிழையோ இருந்தால் தயங்காமல் சுட்டிக் காட்ட வேண்டுகிறேன் நான் மேலும் செம்மையுற அவை பெரிதும் துணை செய்யும். நன்றி! )

Tweet

பதிவுகளை உடனுக்குடன் மின்னஞ்சலில் பெற...