கவிதைகள் விற்பனைக்கு!

என்னில் நிறைந்த‘உன் எண்ணம் எழுதுவது

‘தன்னில் தனையுணரும்‘ தன்மையின் – மின்னல்

கிழிப்பதுபோல் என்நெஞ்சைக் கீறி அதனுள்ளில்

விழிப்பதுநீ செய்யும் வினை!

இல்லாத நெஞ்சில் இருக்கின்ற உன்முகம்நீ

நில்லாதும் என்கண்ணில் நின்றிடுதே! – சொல்லாத

காதல் மொழிகேட்கக் காத்திருப்பேன் என்வாழ்வில்

சாதல் வருமுன்னர் சொல்!

பொய்சொல்ல வேண்டாம்! புதைகிறேன்! காதலெனும்

மெய்சொல்ல என்னுயிர் மீளுமே!  - கையெழுதக்

கற்பனையில் நீயிருக்கக் காணும் கவிதையெலாம்

விற்பனைக்கு! நீயே விலை!

மெல்லச் சிரித்தாயோ? மேன்மைக் கவிபலரும்

சொல்லாக் கவிதைபல சொன்னாயோ? – இல்லா

அழகென்ன அன்பே! அதில்வீழ்ந்தே பாவம்

பழகென்றன் நெஞ்சேங்கப் பார்!

திரையால் நமைமறைத்துத் தேங்குதல் போதும்!

கரையா கடல்மறைக்கும் கண்ணே? – வரையில்லா

அன்பால் இணைவோமா? ஆழ்ந்தும் அகலாதும்

உன்பால் உயிர்ப்பேன் உணர்!

நின்று நடந்தாய்நீ! நீங்காதென் உள்ளத்தே

வென்று கடந்தாய்நான் வீழ்ந்தேனே! – சென்ற

பொழுதிற்காய் ஏங்கியே போனதே காலம்

விழுதிற்காய் ஏங்குதே வேர்!
                                                ( தொடரும்.....)

(  மாயனூர்ப்பதிவுகள் – 1995 )

படங்கள்- நன்றி கூகுள்

Tweet

பதிவுகளை உடனுக்குடன் மின்னஞ்சலில் பெற...