எங்கிருந்தாலும் வாழ்க.

ஈரமுலர்ந்த  மணல்வீடொன்றின் கலைந்துதிரும் ஆயிரமாயிரம் துகள்களின்  மிச்சமிருந்தன, வனைந்த கரங்களால் இணைந்த கனவுகள். அலை ஆரத்தழுவி அத்தனையும் உட்செரித்த  பேராழங்களில் உவர்மண்ணாய்க் கிடந்தவோர் நாளில் திடீரென நினைவு வந்தது,…. அன்று அவனை அறியாமல் அகன்றுபோன அவளது பிறந்தநாள்…….!

எங்கோ ஓர்துகள் காலுந்தி மேலெழ, அதனை வாரிற்றுச் சொற்சுழல்.

தலைகீழ்க் கோபுரமொன்றின் கலசமாகக் கிடைத்த வாய்ப்பென்றெண்ணித் துடுப்பொன்று துழவ உடைகல்லாய், மீள்சேராத நீர்ப்பிளவையின் உட்புறம் இப்படியாக இருந்தது………………

என்பேரும் உன்பேரும் இணைகின்ற போது

     இனிக்கின்ற என்நெஞ்சம் நீ‘இல்லை என்னும்,

துன்பத்தின் தூக்கிற்குள் தலைசிக்க எங்கோ

     தூரத்தில் நீவாழத் துடிக்கின்ற தின்னும்!

ஒன்றாகு வோமென்ற நிலையில்லை இன்று!

     ஒவ்வொன்றாய்க் கலைகின்ற கனவுள்ளே நின்று

‘நன்றாக நீவாழ்க பல்லாண்டு’ என்று

     நினைக்கின்ற மனமென்னில் எப்போதும் உண்டு!

கண்மூடத் தெரிகின்ற கனவோடு.. உன்னில்!

     கதிர்பட்டுத் தெறிக்கின்ற ஒளியோடு.. உன்னில்!

மண்சேர மணக்கின்ற மழையோடு.. உன்னில்!

     மறுக்காமல் நதியேற்கும் கடலோடு.. உன்னில்!

விண்முட்டத் துடிக்கின்ற மலையோடு.. உன்னில்!

     விதியாடும் விளையாட்டின் வலியோடு.. உன்னில்!

திண்டாடும் மனம்உன்பேர் திகட்டாமல் சொல்லித்

     தெய்வத்தின் அருள்வேண்டி நீவாழ்க என்னும்!

தூரத்தில் நீசென்று மறைந்தாலும் என்ன?

     தொடங்காத கதையென்னில் முடிந்தாலும் என்ன?

ஓரத்தில் நீயென்றே ஒளித்தாலு மென்ன?

     ஓய்விலுன்  பேர்சொல்லி ரசித்தாலும் என்ன?

நீரற்ற நதியாகி நின்றாலும் என்ன ?

      நீயற்ற வாழ்வென்னில் நீண்டாலு மென்ன?

பாரத்தில் மூச்சற்று வீழ்ந்தாலும் உன்றன்

       பாதத்தின் தடம்தேடிப் பார்க்கின்றே னேடி!

ஒளிகின்ற விளையாட்டில் நீதோற்றுப் போனாய்!

     ஒளித்தென்னைக் காட்டாமல் நான்வென்று.. என்ன?

குளிர்கின்ற தீக்குள்ளும் காய்பனியி னுள்ளும்

     கிடந்தென்றன் மனம்வாடக் கடன்பட்ட தென்ன?

துளிர்க்கின்ற தளிரெல்லாம் நீகொய்து போவாய்!

     துணையாகும் கனவும்நீ துண்டிப்ப தென்ன?

வளர்கின்றாய் எனைத்தின்று நான்தீரத் தீர

     வலியோடு சுகம்தந்து வாழ்விப்ப தென்ன?

போரில்நான் புறங்காட்டிப் போனாலும் என்ன?

     பொய்யான முகத்தோடு திரிந்தாலு மென்ன?

ஊரில்என் பேர்‘ஊமை ஆனாலும் என்ன?

     உன்னோடு பழகாமல் பிரிந்தாலும் என்ன?

நாரில்லாப் பூமாலை நானானால் என்ன?

     நரைகூடி உடல்மெல்ல நசிந்தாலும் என்ன?

நேரில்'உன் முகம்காண முடியாத போதும்

     ‘நிலவாகக் கதிராக நீவாழ்க!’ என்பேன்!

பட உதவி - நன்றி: https://encrypted-tbn3.gstatic.com/images

Tweet

பதிவுகளை உடனுக்குடன் மின்னஞ்சலில் பெற...