இன்புற வழிகள் ஏழு;உங்கள் தமிழைத் தெரிந்து கொள்ளுங்கள்-15

முதலில் இவை ஓர் அரசனின் நன்மைக்காய்ப் புலவர்களால் சொல்லப்பட்ட வழிமுறைகள் என்பதைச் சொல்லிவிடுகிறேன். நமக்கும் பயன்படும் கருத்துகள் இதில் இருந்தால் பயன்படுத்திக்கொள்ளலாம்.

புறப்பொருள் வெண்பாமாலை என்னும் நூல்: “ கல்தோன்றி மண்தோன்றாக் காலத்தே முன்தோன்றி ….” என்ற வரிகள் இடம்பெற்ற நூல்தான். அதன் உரையுள் அரசன் இன்புற்றிருக்க என்ன செய்ய வேண்டும் என சொல்லும் பாடல் இது.

ஒன்றில் இரண்டாய்ந்து மூன்றடக்கி நான்கினால்

வென்று களங்கொண்ட வெல்வேந்தே – சென்றுலாம்

ஆழ்கடல்சூழ் வையத்துள் ஐந்துவென்(று) ஆறகற்றி

ஏழ்கடிந்(து) இன்புற்(று) இரு.

இதில் வரிசையாக ஒன்று முதல் ஏழு வரையான எண்கள் இடம்பெற்றுள்ளன. அவை அந்த எண்களைக் குறிக்காமல் குறிப்பால் வேறு பொருளைக் குறித்து வருகின்றன.

ஒன்றில் இரண்டாய்ந்து என்பதற்கு அறிவினால் நன்மையும் தீமையும் ஆய்ந்து என்று பொருள் கொள்ளலாம்.

மூன்று அடக்கி என்பதற்கு, நட்பையும் பகையையும் ஏனையோரையும் தன்வயப்படுத்தி என்பது பொருள். இதில் நட்பை அன்பினாலும் பகையைத் துணிவினாலும் ஏனையோரை நடுவுநிலையாலும் தன்வயப்படுத்தலாம்.

நான்கினால் வெல்லுதல் என்பது சாம பேத தான தண்டம் என்னும் இவற்றால் வெல்லுதல். இதனை யானை, குதிரை, தேர், காலாள் ஆகிய நால்வகைப் படைகளாலும் வெல்லுதல் என்றும் கொள்ளலாம்.

ஐந்து வெல்லுதல் என்பது ஐந்து புலன்களையும் நம் கட்டுப்பாட்டிற்குள் வைத்தல் என்பதைக் குறிக்கிறது.

அகற்ற வேண்டிய ஆறு ஆவன, ( அகற்றுதல் என்பதற்கு அதிகரித்தல் என்ற பொருள் உண்டு . இங்கு அப்பொருளே கொள்ளப்பட வேண்டும்)

படை, மக்கள், உணவு, நல் ஆலோசகர் குழு ( அமைச்சு ), நட்பு, பாதுகாப்பு ( அரண் ).

விரட்டப்பட வேண்டிய ஏழாவன, பேராசை, கடுஞ்சொல், அதிகப்படியான தண்டனை, சூதாட்டம், அதிகப்படியான பொருள் சேர்த்தல், கள், அதிக காமம்.

 ஒன்றினால் இரண்டை ஆராய்ந்து, மூன்றை அடக்கி, நான்கினால் ஐந்தை வென்று,ஆறையும் பெருக்கி ஏழையும் விரட்டினால் இன்புற்று வாழலாம் என்கிறது இந்தப் பாடல்.

ஒன்று முதலான இந்த எண்களுக்கு வேறு சில பொருளும் சொல்கிறார்கள். அறிய வேண்டுவோர் புறப்பொருள் வெண்பாமாலை நூலைப் பார்க்கலாம்.

இப்படி எண்களை வைத்துக்கொண்டு பாடல்கள் எழுதுவதை எண்ணலங்காரம் என்று நம் இலக்கணம் சொல்கிறது.

பலருக்கும் தெரிந்த காளமேகத்தின்,

“முக்காலை ஊன்றி மூவிரண்டு செல்கையில்

ஐந்துதலை நாகம் அழுத்த கடித்தது ,” ( என்ன செய்வது? ) 

என்ற கேள்வியும், அதற்கு,

“பத்துரதன் புத்திரனின் மித்திரனின் சத்துருவின்

பத்தினியின் கால்வாங்கித் தேய்.“

என்ற பதிலும் இந்த எண்ணலங்காரத்தினுள்படுவதுதான். இப்பாடலும் இதற்கான பொருளும் இணையத்தில் பலராலும்  சொல்லப்பட்டுவிட்டது.

எனினும் இதுவரை அறியாதவர்க்காய்,

முக்கால் – இரண்டு காலுடன் கையில் ஊன்றும் கோலுடன் மூன்றுகால்.

மூவிரண்டு – ஆறு. தமிழில்ஆறு என்பதற்கு வழி என்ற பொருள் இருக்கிறது.

- கையில் கோலை ஊன்றி வழியில் செல்லும் போது

ஐந்து தலை நாகம் – ஐந்து தலை நாகம் என்பது எப்பக்கமும் முள்ளினை உடைய நெருஞ்சியைக் குறித்தது.

அழுந்தக் கடித்தது – (நடக்கும் போது கிடந்த நெருஞ்சியை காலால்) மிதிக்க அது குத்தியது.  ( என்ன செய்வது?)

அதற்கான பதில்,

பத்து ரதன் – பத்து – தசம், பத்து ரதன் - தசரதன்

புத்திரனின் மித்திரன் – தசரதனின் புத்திரன் இராமன். அவன் நண்பன் ( மித்திரன் ) சுக்ரிவன்

மித்திரனின் சத்துரு – மித்திரனாகிய சுக்ரிவனின் எதிரி ( சத்துரு ) வாலி .

சத்துருவின் பத்தினி – சத்ருவாகிய அந்த வாலியின் மனைவி தாரை.

பத்தினியின் கால் வாங்கித் தேய் – தாரை என்னும் சொல்லில் உள்ள ( துணைக்) காலை எடுத்துவிட்டு ( வாங்கி ) தேய். தாரை என்கிற சொல்லின் துணைக்காலை எடுத்துவிட்டால், தரை.

நெருஞ்சி முள் குத்தினால் என்ன செய்வது என்ற கேள்விக்குக் காலைத்  தரையில் தேய் என்னும் பதிலை இந்தப் பாடல் இப்படிச் சொல்கிறது. நேரடியாகச் சொன்னால் அதிலென்ன ரசனை இருக்கிறது?

இப்படிப்பட்ட பல சொல்லாடல்களுள் புதைந்து கிடக்கிறது மொழியின் நுட்பம்.

வாருங்கள் ...! நம் தமிழை நாம் தெரிந்து கொள்வோம்.

பட உதவி - நன்றி https://encrypted-tbn2.gstatic.com/images

Tweet

பதிவுகளை உடனுக்குடன் மின்னஞ்சலில் பெற...