மறைக்கப்பட்ட கடிதங்களில் இருந்து…. (2)

 மறைக்கப்பட்ட கடிதங்களில் இருந்து..!   

 எனும்முந்தைய பதிவின் தொடர்ச்சி.

இருவில்லும் இல்லை கொடுவாளும் இல்லை

     இதயத்தின் உள்ளே இறங்க

ஒருபார்வை போதும் தடுமாறுந் தாளம்

     உடல்மேளம் கொட்டி முழங்கும்!

பருவத்தின் தாழ்கள் உருவற்றுத் தேயப்

     பகல்பட்டு வற்றும் பனிபோல்

நெருக்கத்தில் ஆழ நடுக்கத்தில் என்னை

     நெருப்பிட்டுக் காயும் உயிரே!

இலையொன்று வீழ மரமொன்று சாயும்

     இதுதானோ காதல் கொடுமை ?

சிலையன்(று) என்னைச் சிறைசெய்த உன்னால்

     சிறகற்றுப் போன வறுமை!

மலைகிள்ளி வானில் மலர்போலத் தூவும்

      மதம்கொண்டு நின்ற பெருமை

கலைகின்ற மேகச் சிறுதூற லாக்கிக்

        கடக்கின்றாய் என்ன புதுமை!!

                                      

கடிவாளம் இன்றி இடிமின்ன லாகிக்

        காற்றாகிப் பறந்த தெல்லாம்

முடிகின்ற துன்னில் முள்ளான எண்ண

        முனைகுத்தும் நொடிகள் தோறும்

வடிகின்ற சொல்லை வனைகின்ற கைகள்

        வாய்ப்பில்லை என்ற போதும்

பிடிவாதம் பேசிப் புண்பட்டுச் செத்துப்

         போகட்டும் துன்பம் இல்லை!!!

படம் உதவி - நன்றி  https://encrypted-tbn1.gstatic.com/