காமத்தின் வரைவிலக்கணம்.

காமம் என்னும் உணர்வு எப்படிப்பட்டது என்று கேட்டால் அதனை எப்படிச் சொல்ல முடியும்? மொழியினால் கட்புலனாகாத உணர்ந்தறியக் கூடிய ஒன்றை எந்த அளவிற்குக் காட்சிப்படுத்த முடியும்…? நாம் ஏற்கனவே பார்த்ததுபோல் நம் சங்க அக இலக்கியங்கள் அதனைக் காட்டப் பெரிதும் முயன்றிருக்கின்றன. இந்தப் பதிவு காமத்தைச் சங்கப் புலவர்கள் சொற்களால் எவ்வாறு வரையறுக்க முயன்றிருக்கிறார்கள் என்பதை ஒட்டிய சங்க இலக்கியப் பதிவுகளின் தொடர்ச்சியாய் அமைகிறது.

காமம் என்றால் அன்று காதலைக் குறித்தது என முன் பதிவுகளில் பார்த்தோம். அது வந்தால் உண்ணத்தோன்றாது…உறங்கத்தோன்றாது… மனதிற்குப் பிடித்தவரையே நினைத்திருக்கத் தோன்றும் என்றெல்லாம் அதன் நிலைகளை விளக்க முடியும்.

இன்னொருபுறம் வரையறை அல்லது வரைவிலக்கணம் என்பது உணர்ச்சிகளுக்கு அப்பாற்பட்டது. கறார்த்தனமானது. பிதகோரஸ் தேற்றத்தை வரையறை செய்யும்போதோ அல்லது பாஸ்கலின் விதியை விளக்கும் இடத்திலோ அலங்காரச் சொற்களுக்கோ,  உணர்ச்சிக்கோ எந்த வேலையும் இல்லை.

அடுத்ததாய் வரைவிலக்கணம், என்பது முற்றிலும் உணர்ச்சி சாராதது. முற்றிலும் அறிவுசார்ந்த, வறட்சியும் கட்டுப்பாடும் கொண்ட மொழியால் ஆனது.

ஆனால் கட்புலனாகாத உணர்ச்சி சார்ந்த ஒன்றை  வரையறுக்கும் போது செழுமையும் சுதந்திரமும் கொண்ட நுட்பமான மொழியின் தேவை இருக்கிறது. சங்கமொழி மரபு அதனைப் புரிந்து கொண்டிருக்கிறது.

அதனால் அது ஒரு காணப்படும் காட்சியின் ஊடாக, அதை வாசிப்பவன் மனதில் இன்னொரு உணர்ச்சியை ஏற்படுத்தி  அந்த அனுபவத்தைப் புலப்படுத்த முயல்கிறது. இலக்கிய இன்பம் என்றெல்லாம் நாம் சொல்வது இவை போன்ற முயற்சிகளைத்தான்.

தமிழ்ச் சங்க மரபு அதனை முயற்சித்திருக்கிறது. நாம் இதற்கு முன் பார்த்த , நீர்ப் பொழிவால், உடையும் விளிம்பில் இருக்கின்ற கரை என்றது இதுபோன்ற கருத்து நிலையிலான ஒன்றின்  காட்சிப்படுத்தல் தான்.

.

பொதுவாக நாம் இதுவரை கண்ட சங்க இலக்கியப் பதிவுகள் பெரிதும் யானையை, அதிலும் குறிப்பாக ஆண் யானையை மையம் கொண்டிருப்பதை இப்பதிவினைத் தொடர்பவர்கள் அவதானித்திருக்கலாம்.

பழங்காலத்தில் “யானை நூல்” என்றொரு நூல் இருந்தது. நாம் இழந்த நூல்களுள் இதுவும் ஒன்று. இலக்கியத்தின் வாயிலாக, நாம் யானைகளைப் பற்றிய பண்டைய மக்களின் புரிதல் பலவற்றை மீட்டெடுக்க இயலும்.

யானைகள் தாய்வழிச் சமூக அமைப்புக் கொண்டவை. அவை கூட்டம் கூட்டமாகவே  வசிப்பன.

கூட்டத்திலிருந்து விலகும் யானை ஆண் யானையாகவே இருக்கும்.

விலகுவதற்குப் பொதுவான காரணம் அதற்குத் தோன்றும் மதம்.

பொதுவாக இம்மதம் அதன் பருவச்சுழற்சியில் ஏற்படும் பாலுணர்வு மிகுபடும் போது தோன்றுகிறது. அந்நிலையில் தன் கூட்டத்தில் இருந்து அது பிரிந்து செல்கிறது.

இதைத் தூண்டும் இன்னொரு காரணியாகக் குளகு என்னும் செடியைச் சங்க இலக்கியங்கள் குறிப்பிடுகின்றன. இதைத் தின்றால் சில தருணத்தில் பருவம் வந்த ஆண் யானைக்கு மதம் இளகும் என்பதைப் பதிவு செய்து வைத்திருக்கின்றன.

இந்தக் குளகு என்பதற்குத் தழை உணவு என்று பொதுவாகப் பொருள்சொல்கின்றனர் நம் உரையாசிரியர்கள்.

இது, அதிமதுரம் என்னும் செடியைக் குறிப்பது என்னும் பார்வையும் உண்டு. உறுதிப்படுத்தப்படவில்லை.

குறிப்பிட்ட பருவத்தில் ஓர் யானை, இந்தக் குளகைத் தப்பித்தவறித் தின்றுவிட்டால் அதற்கு  மதம் பிடித்துவிடுகிறது.

சென்ற பதிவில் தோழனின் அறிவுரையைப் பார்த்திருந்தால் இந்தத் தொடர்ச்சி புரிந்திடச் சிரமம் இருக்காது.

அதில் காதல் வசப்பட்டவனின்  தோழன், “உன் காதல் உன் நிலையைச் சீரழித்துவிடும், பெரியவர்கள் உன்மேல் கொண்ட மதிப்பைக் கெடுத்துவிடும் அதனால் காதலை விட்டொழி!” என்று சொல்வான்.

அதற்குக் காதல் வசப்பட்ட தலைவன் இந்தக் குளகைத் தின்று மதம் கொண்ட யானையை எடுத்துக்காட்டுகிறான். யானைகள் காட்டிலுள்ள பல்வகைப்பட்ட தாவரங்களை உண்கின்றன. அவற்றுள் குளகும் இருக்கும்.

ஆனால், உரிய பருவம் வந்த காலத்தில்,  அக்குளகை மென்றுவிடும் போது யானைக்கு மதம் பிடிக்கிறது.

இங்கு யானைக்குப் பருவம் வந்த போதும் மற்ற தழை உணவுகளை உண்ணுங்காலத்து மதம் தூண்டப்படுவதில்லை.

எனவே மதம் பிடிப்பதற்குப்  பருவம் மட்டுமே காரணம் இல்லை.

சரி… குளகுதான் அதற்குக் காரணமோ என்றால்,

மற்ற நேரங்களில் மற்ற மற்ற யானைகள் குளகை உண்ணும் போதும் அவற்றிற்கு  மதம் பிடிப்பதில்லை.

எனவே காதல் தகாது என்னும் நண்பனிடம் யானையைக் காட்டித் தலைவன் சொல்வது இதுதான்,

“ யானை கொண்ட மதத்திற்குக் காரணம், அதற்குத் தோன்றிய பருவ உணர்வு மட்டுமோ, அல்லது அது உண்ட குளகு மட்டுமோ அன்று.

உரிய பருவத்தில், மற்ற தழைகளுக்கு இடைப்பட்ட குளகினைத் தின்னும் போது யானைக்குள் இருக்கும் மதம் வெளிப்படுவதுதான் அதன்காரணம்.

காதலும் அப்படித்தான், அது, உரிய பருவம் வந்த ஒருவன், தனக்குரிய பெண்ணைக் காணும் போது மட்டும் அவனுக்கு உள்ளிருக்கும் அவ்வுணர்வு தூண்டப்பட்டு வெளிப்படும் தன்மையையும் உடையது.

எனவே காதல் கொண்டவரைக் காணும்போது எப்படி இருந்தவன் இப்படி ஆயிட்டானே என வருந்த வேண்டியதோ, அல்லது ஏதோ தொற்று நோய் உற்றவனைக் கண்டாற் போல விலக்க வேண்டியதோ இல்லை.

அதனால் காதல் என்பது  மனதால்  மட்டும் ஏற்படுத்தப்படும் துன்பம் இல்லை. ( பிணி )

அது வெளியிலிருந்து வரும் வருத்தம் ( அணங்கு ) எனவும் கொள்ள வேண்டியதில்லை.

அது, தீயாயும் இல்லை. பனியாயும் இல்லை.

வெம்மைக்கும் தண்மைக்கும் இடைநிகர்த்ததாய்த் தோன்றும் உணர்வு, உரியவர்களைக் காணும் போது சிலர்க்கு,  சில நேரங்களில் வெளிப்படும் தன்மையை உடையது. ”

எனத் தானுற்ற உணர்வினை மொழிப்படுத்துகிறான் அவன்.

இதோ அந்தப் பாடல்,

காமம் காமம் என்ப காமம்

   

அணங்கும் பிணியும் அன்றே நுணங்கிக்

   

கடுத்தலும் தணிதலும் இன்றே யானை

   

குளகுமென்று ஆள்மதம் போலப்

           

பாணியும் உடைத்தது காணுநர்ப் பெறினே.

குறுந்தொகை - 136

மிளைப்பெருங் கந்தன்.

இனி இந்தப் பாடலின் சொற்பொருளாராய்ச்சியும் சில நயங்களும்...

காமம் காமம் என்ப – என்னமோ காதல் காதல் என்று குறை சொல்கிறீர்களே!

காமம் அணங்கும் பிணியும் அன்று – அந்தக் காதலைக் கொண்டவர்கள் மேல் வருந்த வேண்டியதோ, அவர்கள் நோயுற்றவர்கள் எனப் பரிதாபப்பட வேண்டியதோ இல்லை.

( அணங்கு என்பது பிறரால் உண்டாகும் வருத்தம்

பிணி என்பது தன்னுக்குள் தோன்றும் நோய் எனச் சொற்பொருளை விளக்குகிறார் உ.வே.சா. )

இப்படிக் கொண்டால் அணங்கை, குளகிற்கும் பிணியை யானையின் பருவத்திற்கும் ஒப்பிடலாம்.

நுணுங்கி – நுண்மையாகி

கடுத்தலும் தணிதலும் இன்றே –  வெம்மையானதாகவும் தண்மையானதாகவும் இல்லை.

குளகு மென்று – குளகு என்னும் இலையை மென்று

ஆள் மதம் போல – அதனால் மதம் கொண்ட யானையைப் போல

காணுநர் பெறின் – தனக்கென உரியவர்களைக் கண்டால்

பாணியும் உடைத்தது – வெளிப்படவும் கூடியது அது.

( வெளிப்படவும் கூடியது என உம்மை கொடுத்துச் சொல்வதால், அது வெளிப்படாமல் மனதிற்குள்ளேயே இருக்கலாம் )

காணுநர் எனப் பன்மையில் சொல்வதால், இக்காதல் உணர்வு ஆணுக்கும் பெண்ணுக்கும் பொதுவான உணர்வு என்பது புலப்படுத்தப்படுகிறது.

சரி நம் புலவர்கள் காமத்தை வரையறுத்து விட்டார்களா…..?

இவ்வளவுதானா என்றால்,

இது தலைவனின் வரையறை….! இது முழுக்கச் சரியாகுமா..?

இதை எல்லாம் கேட்டுக் கொண்டிருக்கும் தோழன் என்ன சொல்கிறான்..?

அவன்  இதற்குச் சொல்லும் இலக்கணம் என்ன..?

தொடர்வோம்.

பின்குறிப்பு - போர்க்களங்களில் யானைக்கு வெறியூட்ட பயன்பட்டவற்றுள் ஒன்றாக இக்குளகு பயன்பட்டிருக்கலாமோ எனத் தோன்றுகிறது. இது குறித்து மேலும் ஆராய வேண்டும்.

நன்றி - படத்திற்கு https://encrypted-tbn1.gstatic.com/