பகவானின் பொருள் தெரியுமா ஜி ?

வெகுகாலமாக நாம் நினைவில் பதிந்து வைத்திருக்கிற அல்லது கற்றிருக்கின்ற ஒன்று தவறென்று அறியும் போதோ அல்லது அது பற்றிய கூடுதல் செய்தி ஒன்றை அறியும் போதோ  மனம் அடையும் உற்சாகம் பல நேரங்களில் எனக்கு ஏற்பட்டிருக்கிறது.

அறிதோறும் அறியாமை காணல் என்று சொல்லுவான் வள்ளுவன்.

தமிழில் கலம்பகம் என்றொரு சிற்றிலக்கியம் உண்டு.

தமிழ்நாட்டுப் பாடநூல் நிறுவனம் 2011 இல் வெளியிட்டுத் தற்போதைய மாணவர் படிக்கின்ற பத்தாம் வகுப்புப் பாடநூல் பக்கம் 204 இல் கலம்பகம் என்பதற்குக் கொடுக்கப்பட்ட விளக்கம் வருமாறு…,

””“கலம்பகம் என்பது, தொண்ணூற்றாறு வகைச் சிற்றிலக்கியங்களுள் ஒன்று. பலவகைப் பொருள்களைப் பற்றிப் பலவகைப் பாடல்களைக் கலந்து இயற்றப்பெறும் நூல் கலம்பகம் எனப்படும்.

கலம்+பகம்= கலம் – பன்னிரண்டு. பகம்- ஆறு.

பதினெட்டு உறுப்புகளைக் கொண்டதால் ( புயவகுப்பு, அம்மானை, கார், ஊசல், இரங்கல், மறம், தழை, தவம், சித்து , பாண், கைக்கிளை, தூது, வண்டு, குறம், காலம், மாதங்கி, களி, சம்பிரதம் ) கலம்பகம் என்னும் பெயர் வந்தது எனவும் கூறுவர்.””””

கலம்பகம் குறிப்பு வரைக என்னும் கேள்வியும் இப்பகுதியில் உண்டு.

தமிழ் விக்கியும் இது பற்றிப் பின்வருமாறு கூறுகிறது

.

“““““தமிழ் இலக்கியத்தில், கலம்பகம் என்பது பலவகைச் செய்யுள்களால் ஆகியதும், பல பொருள்கள் பற்றியதுமான சிற்றிலக்கியங்களில் ஒன்றாகும். கலம்பகம் என்பது கலப்பு, அகம் என்னும் இரு சொற்களின் இணைப்பால் உருவானது. பலவகைப் பாடல்கள் ஒருங்கிணைந்து உருவாவதால் இந்தச் சிற்றிலக்கிய வகைக்கு இப் பெயர் ஏற்பட்டது.

பன்னிரு பாட்டியல் என்னும் நூல் [1] இதன் இலக்கணத்தைக் கூறுகிறது. [2] கலம்பகம் எனும் சொல்லில் கலம் என்பது பன்னிரெண்டையும், பகம்(கலத்தில் பாதி) ஆறினையும் குறிக்கும். ஆக பதினெட்டு உறுப்புகள் அமைய பாடப்படுவதே கலம்பகம் என அழைக்கப்படுகிறது. தமிழில் தோன்றிய முதல் கலம்பகம் நந்திக் கலம்பகம் ஆகும்.”””””

காண இங்கே சொடுக்குக 

இங்கு முதலில் குறிப்பிடப்படும் பொருளில் பிரச்சினை இல்லை.

கலம் என்றால் பன்னிரண்டு. பகம் என்றால் அதில் பாதி ஆறு என்பதுதான் ரொம்பவே உதைக்கிறது.

கலம் என்னும் சொல் பன்னிரண்டைக் குறிக்கும் என்பதற்கான ஆதாரம் நானறிந்தவரை தமிழில் எங்கும் இல்லை.

தமிழ் விக்கி குறிப்பிடுவது போல், பகம் என்பது பாதி என்பதைக் குறிக்கும் என்பதற்கும் தமிழில் சான்றில்லை.

சரி, பகம் என்றால் ஆறு என்றால் அது ஆறு என்ற எண்ணையும் நான் பார்த்த வரைக்கும் தமிழில் எங்கும் குறித்து வரவில்லை.

அகராதி  தேடுவோர் தேடிப்பார்த்துக் கொள்ளுங்கள்.

சிக்கல் என்னவெனில் இந்த ஆதாரமற்ற தகவல்களை எத்தனையெத்தனையோ மாணவர்கள் படித்தும் எழுதியும் தம் அறிவிற் பதித்தும் செல்கின்றனர். இனியும் செல்வர்.

என்ன தமிழ் தானே …………?

இதனால் குடியா மூழ்கிவிடப் போகிறது ….. ?

பகவானே…!

ஆம் இப்போது நாம் தலைப்பிற்கு வர வேண்டுமே!!!

இந்தப் பகவான் முக்கியமானவரோ இல்லையோ பகவான் என்னும் சொல் இந்தப் பதிவிற்கு மிக முக்கியமானது.

திருக்குறளின் முதற்குறளில் வரும் பகவன் என்பது ‘பகவாந்’ என்னும் வடமொழிச் சொல்லின் தமிழ் வடிவம் என்கிறார் பரிமேலழகர்.

வடமொழியில், பகம் என்னும் சொல் ஆறு குணங்களைக் குறிப்பிடுகிறது. ( கவனிக்க.. ஆறு என்ற எண்ணை அன்று )

1.   மகிமை

2.   வீரம்

3.   புகழ்

4.   செல்வம்

5.   ஞானம்

6.   வைராக்கியம்,

என்ற ஆறுகுணங்களும் பகம் எனப்படுகின்றன.

இந்த ஆறுகுணங்களையும் உடையவன் பகவான் ஆகிறான்.

பகவானுக்குப் பொருள் விளங்கிற்றுத் தானே..?

கலம்பகம் என்பதில் பகம் என்பதற்கு இந்த ஆறு குணங்களில் உள்ள ஆறு என்ற எண்ணை எடுத்துக் கொண்டார்கள் போல.

ஆனால் தமிழ் அகராதிகளில் தேடிப் பார்த்தவரை எந்த இடத்திலும் பகம் என்னும் சொல் ஆறு என்பதைக் குறித்து வரவில்லை.

கலம்பகத்தில் உள்ள உறுப்புகள் பதினெட்டு இது சரிதான்.

இதற்குச் சொற்பொருள் ஆராய்ச்சி என்ற பேரில்,

“ பகம் என்றால் ஆறு. அப்படி என்றால்  பதினெட்டில் ஆறு போகக் கலம் என்பது மீதியுள்ள பன்னிரண்டாகத் தானே இருக்க முடியும்?” என்று தங்களின் கணித அறிவைப் பயன்படுத்திப் புதுப்பொருள் கொண்டவரை என்ன சொல்லிப் பாராட்ட பகவானே….?

ஏனோ இதை அறிந்த போது என்னால் உற்சாகப்பட முடியவில்லை.

தமிழ் மொழிப்பயில்வுக்கும் செம்மைக்கும் ஆசிரியர்களையும் பாடநூல்களையும் பெரிதும் நம்பி  இருக்கின்ற நம்முடைய மாணவர்களின் கதி…..?

சரி சரி விடுப்பா..!

இதுனால என்ன தலையா போயிடப் போகுது..!

எல்லாம் நம்ம தமிழ்தானே…  :(( என்னும் குரலுக்கு...... பதில்,

பதற்றம் அதனால்தான்!

படம் -  நன்றி https://encrypted-tbn1.gstatic.com/images